उथल पुथल 
पोखरा । पोखरा महानगरपालिकाले वडा नम्बर ९ मा पर्ने पोखरा बसपार्क क्षेत्रका घर, टहरा भत्काउन सुरु गरेको छ । महानगरले आफैं घर, टहरा हटाउन दिएको समय सीमा सकिँदा खाली भएका घर, टहरा भत्काएर बसपार्क सम्याउन थालिएको हो ।
जग्गाधनीपुर्जा भएका र सुकुमवासीले समेत आफैं खाली गरेका टहरा भत्काएर बसपार्क सम्याउन थालिएको हो । बसपार्क क्षेत्रमा सुकुमवासीका पाँच सयभन्दा बढी घर, टहरा, सरकारी स्कुल, टोल विकास संस्थाका भवनहरू छन् । महानगर प्रमुख धनराज आचार्यले पोखरा बसपार्कको खाली भइसकेको क्षेत्रमा सरसफाइ, संरचना हटाउने तथा सम्याउने काम सुरु गरिएको बताउनुभयो ।
बिहीबार बिहानबाटै संरचनाहरू हटाउन डोजरहरू परिचालन गरिएको छ । प्रमुख आचार्यले बाँकी संरचनाहरू भने शनिबारबाट भत्काउन थालिने उल्लेख गर्नुभयो । “अझै हटाउन बाँकी रहेका सटर, कबल तथा छानाहरू सम्बन्धित पक्षहरूको अनुरोध र आपसी सहमति अनुसार असार ६ गते हटाइने छ ।”
बसपार्कमा रहेका सुकुमवासीलाई भने व्यवस्थापनपछि मात्र हटाउने महानगरको तयारी छ । पोखराको पृथ्वीचोकमा बसपार्क निर्माणका लागि पाँच दशकअघि दुई सय पाँच रोपनी जग्गा अधिग्रहण गरिएकोमा अहिले करिब २६ रोपनीमात्र खाली छ ।
बसपार्क हटाउनुअघि पोखरा महानगरले तीन वटा समिति बनाएको छ । जग्गा खोजी समितिले पोखरा बसपार्कका सुकुमवासी व्यवस्थापन गर्न महानगरका छ ठाउँका जग्गा उपयोग गर्न सकिने सिफारिस गरेको छ । भूमिहीन दलित र भूमिहीन सुकुमवासीलाई व्यवस्थापन गर्ने तयारी छ भने अव्यवस्थित बसोवासीलाई हटाइने भएको छ ।
अहिले जग्गाधनीहरूको वितरण प्रक्रिया तथा क्षेत्रफल यकिन गरी सिफारिस गर्ने न्यायिक निरूपण समिति तथा सुकुमवासी यकिन गरी सिफारिस गर्ने समितिले छानबिनले काम गरिरहेका छन् । दुवै समितिको म्याद असार १७ गतेसम्म थपिएको छ ।
जग्गा सिफारिस समितिले पेस गरेका केही जग्गामा प्राविधिक जटिलता देखिएकाले थप अध्ययन, परीक्षण तथा सिफारिसका लागि समितिलाई १० दिनको थप समय प्रदान गरिएको प्रमुख आचार्यले बताउनुभयो ।
सिद्धार्थ राजमार्ग र पृथ्वी राजमार्ग टुङ्गिने पोखराको पृथ्वीचोकमा २०३२ सालबाट सुरु भएको बसपार्क बनाउने अभियान पाँच दशकमा पनि अधुरै छ । त्यस बेला बसपार्कका लागि अधिग्रहण गरिएको जग्गामा अहिले पाँच सय ७५ सुकुमवासीका टहरा छन् भने केही जग्गा सट्टा भर्नामा दिइएको छ ।
