काठमाडौँ । स्पेनिश कोपा डेल रे फुटबलको उपाधि बार्सिलोनाले जितेको छ । शनिबार राति भएको फाइनलमा रियाल मड्रिडलाई ३–२ ले हराउँदै बार्साले उपाधि जितेको हो ।
बार्साको यो कीर्तिमानी ३२ औँ कोपा डेल रे उपाधि हो । खेलको ११६औँ मिनेटमा जुल्स कुन्डेले निर्णायक गोल गर्दै बार्सालाई उपाधि दिलाएका हुन् । ला कार्टुजा स्टेडियममा भएको फाइनलमा पेड्रीले २८औँ मिनेटमा टाढाबाट गोल गर्दै बार्सिलोनालाई शुरूआती अग्रता दिलाए । तर दोस्रो हाफमा रियाल खेलमा फर्कियो ।
केलियन एम्बाप्पेले ७० औँ मिनेटमा फ्रिकिकबाट गोल गर्दै बराबरी गरे । त्यसपछि ७७ औँ मिनेटमा अरेलियन चुआमेनीले हेडरमार्फत रियाललाई २–१ को अग्रता दिलाए ।
८४औँ मिनेटमा फेरान टोरेसले बराबरी गोल गर्दै खेललाई अतिरिक्त समयमा पुर्याए । र अन्ततः कुन्डेले बार्सिलोनाको जित सुनिश्चित गरे ।
बार्सिलोनाले यस सिजनका तीनै क्लासिकोमा रियाललाई पराजित गरेको छ। जनवरीमा स्पेनिश सुपर कपको फाइनलमा ५–२ र अक्टोबरमा लिग खेलमा रियललाई ४–० ले हराएको थियो ।
अब बार्साले बुधबारदेखि शुरु हुने च्याम्पियन्स लिग सेमिफाइनलमा इन्टर मिलानविरुद्ध खेल्न आत्मविश्वासका साथ अघि बढेको छ। साथै बार्सिलोना ला लिगामा पनि रियालभन्दा चार अंकले अगाडि छ।
